10/03/2026
Монгол Улсын Ерөнхийлөгч У.Хүрэлсүх АНУ-ын төвийн бүсийн Чикаго хотод амьдарч буй монгол иргэдэд төрийн бодлого болон хөтөлбөрүүдийн хэрэгжилтийг танилцуулж, эх орондоо үнэнч байхыг уриаллаа.
Монгол Улсын Ерөнхийлөгч Ухнаагийн Хүрэлсүх АНУ-ын төвийн бүсэд амьдарч буй монгол иргэдийн төлөөлөлтэй Чикаго хотод уулзлаа. АНУ-д 40 гаруй мянган монгол иргэн амьдарч байгаа бөгөөд тэдний 20 гаруй мянга нь Чикаго хотод оршин сууж байна.
Уулзалтын үеэр Ерөнхийлөгч У.Хүрэлсүх төрийн бодлого, гадаад бодлого, “Хүнсний хувьсгал”, “Тэрбум мод”, “Эрүүл монгол хүн”, “Цагаан алт”, “Илгээлт-2100” зэрэг хөтөлбөрүүдийн хэрэгжилт болон улсын нийгэм, эдийн засгийн байдлын талаар товч танилцууллаа.
Тэрбээр гадаадад амьдарч буй монгол иргэдэд суугаа орныхоо хууль, дүрэм, журмыг сахиж, хоорондоо эв нэгдэлтэй байхыг уриалж, эх орныхоо нэр хүндийг өндөрт өргөхийг чиглэл болгосон.
Мөн үр хүүхддээ эх хэл, түүх, соёл, зан заншил, өв уламжлалаа өвлүүлэн эх орноо гэсэн сэтгэлтэй иргэн болгон хүмүүжүүлэхийг хүсэв.
Ерөнхийлөгч У.Хүрэлсүх өмнө нь Ерөнхий сайдаар ажиллаж байхдаа АНУ-д амьдарч буй монголчуудын төрийн үйлчилгээний хүртээмжийг сайжруулах зорилгоор Чикаго хотод Консулын газар нээх шийдвэр гаргаснаа дурдсан.
Тэрээр иргэдэд эрүүл энх, сайн сайхан бүхнийг хүсэн ерөөж, эв нэгдлийг эрхэмлэн, Монгол Улсаа хөгжүүлэхийн төлөө хамтран зүтгэхийг уриалав.
Мөн уулзалтад оролцсон “Юта Монгол” сургуулийн зөвлөх багш Чойдогийн Цэцгээ, Монгол Улсын Консерваторын ахмад багш, чөлөөт уран бүтээлч Нанзадын Зүмбээ, Мэриланд мужийн “Монгол эрдэм” сургуулийн монгол хэлний багш Бадарчийн Нарантуяа нарт Соёлын гавьяат зүтгэлтэн цол хүртээлээ.
Түүнчлэн Гавьяат багш, зураач, барималч Нацагийн Ганхуяг, Монголын Бурхан шашинтны төв Гандантэгчэнлин хийдийн АНУ дахь итгэмжлэгдсэн төлөөлөгч, Вашингтон Ди Си дахь “Монголын буддын шашин, соёлын төв”-ийн үүсгэн байгуулагч гавж Даваанямын Лувсанжамц нарт Соёлын гавьяат зүтгэлтний цол олгосон байна.
Мөн нэр бүхий эрхмүүд төрийн дээд одон, медалиар шагнагдсан.
