25/06/2026
Ang Kuwento ni Rene Baterbonia
Isinilang at lumaki sa Talacogon, Agusan del Sur, si Rene na nagmula sa isang simpleng pamilya. Ang kanyang ama ay isang tricycle driver, habang ang kanyang ina naman ay nagtitinda ng isda upang matulungan ang kanilang pamilya na buhayin ang pitong magkakapatid. Sa kabila ng kahirapan, pinangarap ni Rene na gamitin ang kanyang talento sa basketball upang mabigyan ng mas magandang buhay ang kanyang pamilya.
Sa taas na humigit-kumulang 6 na talampakan at 4 na pulgada, mabilis siyang nakilala bilang isang mahusay na manlalaro. Nagpraktis siya sa mga simpleng outdoor court sa kanilang bayan, at dahil sa kanyang husay at dedikasyon, tinawag siyang “Mr. MVP”.
Ang kanyang unang tagumpay ay dumating nang katawanin niya ang Davao Region sa Palarong Pambansa 2025. Tinulungan niya ang kanyang koponan na makamit ang kanilang kauna-unahang kampeonato sa basketball, itinanghal s'ya bilang Most Valuable Player (MVP) ng torneo.
Kalaunan ay nangako si Rene na maglalaro para sa Ateneo Blue Eagles sa UAAP. Ayon sa kanyang pamilya, plano niyang ipadala ang malaking bahagi ng kanyang allowance sa kanilang tahanan upang makatulong sa kanilang pang-araw-araw na pangangailangan.
Noong Hunyo 8, 2026, pumanaw si Rene sa isang team-building activity sa Aurora kasama ang kapwa student-athlete na si Divine Adili. Ayon sa mga awtoridad, ang sanhi ng kanyang pagkamatay ay asphyxia dulot ng pagkalunod, habang nagpapatuloy ang imbestigasyon hinggil sa insidente.
Naihatid na sa kanyang huling hantungan noong Hunyo 24, 2026 sa kanyang bayan sa Talacogon, Agusan del Sur. Siya ay inilibing sa bagong municipal cemetery sa Barangay Labnig.
Bago ang kanyang libing, libu-libong tao ang dumalo sa kanyang burol at nakiramay sa kanyang pamilya. Maraming residente, kaibigan, kaklase, atleta, at tagasuporta ang nagbigay-pugay sa batang basketbolista na naging isang inspirasyon sa lahat.
