25/09/2025
No er det verkeleg haust på Søre Sunnmøre! Førre helg passerte det første uværet – og med det fulgte eit klassisk fenomen: tare som blir skylt opp på strendene våre.
Tareskogen er ikkje berre ein levande heimstad for fisk og smådyr, men fungerer òg som naturleg kystvern mot bølgjer og erosjon. Når hausten kjem, slepp tareskogen ute i havet dei eldste blada sine, og bølgjene kan rive laus heile tarestokkar. I denne prosessen blir energien i bølgjene dempa, og erosjonen på land minkar. Slik ender mykje tare enten på strendene eller på havbotnen.
For nokon kan den oppskylde taren sjå rotete ut, men han gøymer mykje meir – under taren kryr det av smådyr som igjen gir næring til fuglar på jakt etter mat langs fjøra.
Taren er skogen i havet – og samtidig ei kjelde til mat, medisin og inspirasjon.
Vil du oppleve dette fascinerande universet på nært hald? Bli med oss på tangsafari i vår!
