08/02/2026
Бид хоёрын 64 дэх өглөөний цай ямар орных гэж бодож байна? Энэ бол Хятад улсын тусгай захиргааны нэг бүс болох Хонг Конг хот.
Хонг конг өглөөг эхлүүлэхээсээ өмнө эхлээд энэ хотынхоо талаар багахан мэдээлэл хуваалцъя. Газар зүйн байрлалаас нь харвал Хятадын өмнөд хэсэгт орших ба маш их уулс, далайгаар хүрээлэгдэж шахагдсан байдаг тул барилга байгууламж нь хоорондоо шигүү, дээшээгээ давхарлагдан баригдсаар дэлхийд өндөр барилга байгууламж хамгийн ихтэй, орчин үеийн, гал залуу, эрч хүчтэй хот гэдгээрээ танигдсан байдаг. Харин түүхэн талаас нь авч үзвэл 1942–1997 он хүртэл буюу 55 жилийн турш Английн колон хот байсан учраас тэдний соёлд барууны хэв маяг нэлээдгүй шингэсэн байдаг нь хоол, кино урлаг, хөгжим зэргээс нь харагддаг.
Ийм завгүй, хөл хөдөлгөөнөөр дүүрэн, багтаж шингэх ч зайгүй болсон энэ хотод Cha Chaan Teng буюу “цай” - ны газар эсвэл ресторан гэж нэрийдсэн зөвхөн Хонг конг-т л харж болох амьдралын хэв маяг үргэлж буцалж байдаг гэнэ. Монголчууд бид тайван суугаад хоол идэхийг илүүд үздэг бол харин тэнд энэ соёл нь өдрийн аль ч цагт байсан гялс идээд гялс дараагийнхаа хүнийг суулгах, эсвэл танихгүй хүнтэй нэг ширээнд суугаад цуг хооллохыг чухалчилна. Мэдээж хоолны газрууд нь хүртэл хамгийн хурдан хоолоо гаргаж үйлчилдэг байх нь ойлгомжтой. Тэгвэл өглөөдөө хийж иддэг бас хурдан болдог өглөөний хоол дотроос нь бид хоёр өндөгтэй шарсан талх, макарони гоймонтой шөл гэсэн 2 хоол, харин уух зүйлээрээ хар цайтай кофе гэх үү, кофетой хар цай гэх үү нэг тийм сонирхолтой уух зүйлийг нь сонгож хийж идсэн нь энэ билээ.
Энэ хотын талаар бас нэг сонирхолтой байж магадгүй нэг баримт хэлвэл, Хонг Конг-т 4-ийн тоог бэлгэшээж авч үздэггүй юм гэнэ. Тэр нь Кантон хятад хэлээрээ үхэл гэсэн үгтэй ижил сонсогддог аж. Үүнээсээ болоод барилга байгууламжид нь 4, 14, 24 гэсэн давхрууд байдаггүй гэж байна шүү. Явж үзсэн хүмүүс минь, энэ үнэн үү кк
