Gotthard Base

19/06/2026

最後一年同大家講「端午節快樂」！

雖然GB主打西餐，但節日嘅意義，就係搵個藉口，同身邊嘅人食餐好嘅，或者做啲開心嘅事。

無論你今日食粽、食西餐、定係同屋企人一齊食餐飯，都祝你端午節快樂，生活愉快。

18/06/2026

小編為咗防止阻住地球轉，上星期六日唔去得廚房。

大內總管要確保70幾份外賣順利，要去現場跟進，仲順手影埋相——嘩，個氣勢好勁。

廚房出菜位唔夠位排，外賣盒要擺埋出面嘅餐枱，廚房爐頭全開。你睇到嘅係外賣，背後係一場小型戰役。

17/06/2026

好多人話，當年係睇咗呢篇報導，先認識GB、認識大廚Kan。

嗰陣hidden menu仲係hidden，冇人知有啲咩。後來變咗招牌菜，寫埋上menu。

時間過去6年，大家見證GB由一間小巷餐廳，變成有人專程由烏溪沙過嚟買外賣嘅地方。一次次難關，都係靠你哋推門入嚟，一餐飯一餐飯咁撐住。

6年前嘅一篇報導，6年後嘅一個道別——路未到盡頭，仲有半年。

《GB回顧 — 3》上回提到，Gotthard Base 廳面隧道嘅深處，係一個「睇得見」嘅廚房，裡面嘅設備幾乎達到酒店西餐廳級數，而呢個廚房，最終打動咗一位關鍵人物 — Kan哥。

但其實，由「游說」到「加盟」，中間足足用咗我大半年時間。

Kan哥唔係一般廚師。佢喺銅鑼灣利園酒店入行，跟隨瑞士籍廚師學藝多年，其後轉戰多間著名酒店西廚，最後一份酒店工係洲際酒店法國餐廳 Spoon，跟米芝蓮星級名廚 Alain Ducasse歷練三年。廚藝紮實，要求極高，同時亦極低調、寡言。

我第一次真正認識佢，係同太太拍拖時，經常去太古坊一間小店鋸扒。店嘅英國合夥人係我朋友，而主廚兼另一合夥人，就係 Kan哥。佢嘅扒固然出色，但更令我哋印象深刻嘅，反而係伴碟嘅蔬菜，都食得出心機。

2018年，我膽粗粗搵佢做顧問。老實講，心入面冇乜把握，一間北角小店，一個未開張嘅歐陸 bistro concept，要吸引一位五星級嘅主廚落場，聽落都幾「黐線」。但我一直覺得，GB 嘅廚房唔應該只係硬件到位，而係要有「軟件」— 人。

於是，我斷斷續續同 Kan哥同佢拍檔傾，講 concept、講想法，亦帶佢睇裝修進度。佢一直冇答應，只係觀察。裝修完成後，我甚至將間舖丟空三個月，等。

直到有一日，Kan哥再嚟睇場。呢一次，係個廚房打動咗佢。佢終於點頭，而且唔止做顧問——係親自落場做主廚。我亦同意佢繼續同拍檔經營太古坊間餐廳，由英國佬負責睇舖。

GB 開業之後，餐廳嘅風格慢慢成形。原本嘅 motto 係 “A Taste of Switzerland & Italy”，但隨住 Kan哥同團隊加入，歐洲西廚嘅技術同細節，自然滲入 menu。由食材、火候，到擺盤，每一步都多咗一份講究。

有啲菜，慢慢成為熟客之間口耳相傳嘅「hidden menu」— Beef Wellington、Lobster Thermidor …… 唔係日日有，有啲要預訂，但識食嘅客人會專程嚟。

開業第一年，有一晚收工後，我同 Kan哥兩個坐低傾咗好耐。中間有啲火花，但我開始真正明白，亦欣賞佢對食物嘅堅持。

由嗰一刻開始，我決定放手，我唔再干涉廚房運作，畀佢極大自主權；公司只負責後勤、marketing 同客戶服務。之後，我哋之間再冇乜爭拗☺️

有時我想行快啲、靈活啲，佢會拉住我；有時佢太執著，我又會同佢講現實。慢慢地，我哋建立咗一種默契，我守方向，佢守底線。

GB 可以行到今日，其實唔只係一個空間、一個設計，而係一班人，將一套標準，一日一日咁實踐出嚟。

客人未必知道廚房入面發生咩事，但佢哋食到嘅每一口，其實都係 Kan哥同團隊多年累積嘅堅持。

而我自己，亦由最初只係「開一間餐廳」，慢慢學識點樣同一位匠人廚師，一齊經營，一齊實踐理念。

呢段關係，好似 GB 條「隧道」——有人駕駛，有人導航，載住滿車客人，一直向前，直到見到光。

待續（下一篇就唔再係回顧，而講 GB 嘅前程）

— 腦細

圖片：2020《飲食男女》專訪節錄

17/06/2026

海陸大餐，旁邊有一小碗煙三文魚沙律。

分開上，係為咗等你食到每款嘅原味，唔會撈埋一碟。

廚房嘅心思，有時就喺呢啲位。

16/06/2026

午市漢堡，塊扒先係主角。

美國穀飼牛肉，油花靚，煎完仲有肉汁。廚房自己調味、自己煎。

大廚要揀到塊靚牛肉，先有信心推出。

你見到嘅漢堡，由塊扒開始，由大廚嘅堅持決定。

15/06/2026

廚房大家分晒工，有人每日切洋蔥，有人每日煎扒，有人每日炸魚。同一把刀、同一個爐、同一款醬汁。

但係如果切得唔好，會影響煮醬；醬汁唔夠靚，又會影響塊扒嘅味道。一環扣一環，冇人可以求其。

每日重複，唔係因為冇選擇，而係因為選擇咗做好自己嗰部分。

14/06/2026

聚散有時，但未係現在。

GB會繼續營運至今年年底。聖誕節、除夕夜、海外返嚟嘅老朋友——仲可以喺堡壘街7號，坐低，食一餐飯。

多謝你哋呢幾個星期嘅每一道目光、每一個分享、每一次推門。

光，代表希望。我哋仍然相信會有奇蹟。

《Every place has its time》 呢段時間，多謝大家。

自從4月底提到 Gotthard Base 可能於6月30日結束，好多街坊同朋友特意到訪支持，亦見到好多熟悉同久違嘅面孔。大家分享喺 GB 嘅回憶 —— 生日、升職、farewell、reunion，甚至求婚。對大家嚟講，呢度唔只係一餐飯，而係一份屬於某個時刻嘅快樂。

有啲客人專程再返嚟坐一坐，重溫當年片段，對我哋嚟講，同樣珍貴。

呢幾個星期，衷心感謝您哋 🙏🏼🫶🏼

🚇🚇🚇🚇🚇🚇🚇🚇🚇🚇🚇🚇🚇🚇🚇
同大家分享最新安排：

經過我與 Kan 哥及團隊商討後，GB 將會繼續營運至今年年底。希望讓熟客，以及海外回港嘅朋友，可以再同親朋喺 GB 相聚，一齊過 2026 聖誕、除夕夜迎新年。

未來呢幾個月，我哋會懷着感恩嘅心做好每一餐，希望你每次回來，都覺得值得 💛

藉此，亦衷心感謝業主對租約嘅彈性安排，讓我哋可以將這段路，再走遠一點，有更充足時間與客人好好道別。

再坦白講多少少：決定延長多六個月，並唔係一個輕鬆嘅決定。每年7、8月一向係外遊旺季，亦係餐飲淡季，對營業嚟講本身就有一定壓力，但我哋仍然選擇行多一步，其中一個原因，係想俾團隊多一點時間。

大家都知道，而家嘅就業市場並唔容易。如果同事喺呢段時間搵到更好嘅機會，我哋一定支持；但亦意味住營運上，無論係樓面定廚房，有機會出現人手緊張嘅情況。

如果有做得未夠好嘅地方，希望大家多多包涵。亦再一次，多謝大家一直以來嘅支持與陪伴 💞

🚇🚇🚇🚇🚇🚇🚇🚇🚇🚇🚇🚇🚇🚇🚇
There is always light at the end of the tunnel
光，代表希望；我哋仍然相信會有奇蹟。
而離別，有時並唔只係傷感。

Parting is such sweet sorrow,
that I shall say good night till it be morrow.
— William Shakespeare 《Romeo and Juliet》

我期待喺 12月31日除夕夜，帶領 GB 同事同您喺餐廳內，一齊唱《Auld Lang Syne》，為呢段旅程劃上一個溫暖嘅句號。

We had our time.

— 腦細

13/06/2026

小編問大廚：「星期六日去唔去得廚房？」

大廚話：「唔方便，因為兩日都有成70幾個外賣。」

70幾個外賣，即係過百個工序，逐碟煮、逐碟包，出菜位排滿單。咁大陣仗，小編當然唔敢阻。

如果呢兩日你見到廚房忙到冇停手，一定係因為外賣單又多又急。請大家俾多少少耐性，因為廚師係喺度同時間競賽。

你嘅美食，喺路上了。

12/06/2026

有熟客臨走之前，同小編講：「我會記住呢度嘅味道。」

小編問：「邊道菜？」

佢話：「唔係菜，係呢度嘅感覺。坐低嗰下嘅放鬆，望住廚房出菜嘅期待，食完之後嘅滿足。呢啲加埋，先係GB嘅味道。」

最難忘嘅味道，有時唔係食物，而係食飯嗰刻嘅感覺。

11/06/2026

【父親節｜由廚房男人主理嘅一餐】

父親節套餐，唔係普通嘅一餐飯。

廚房入面嘅男人——大廚、仲有煎扒嗰班兄弟——日日對住爐火，煮俾人食，未必成日有時間陪自己爸爸，甚至未必記得慶祝屬於自己嘅節日。

但父親節呢兩日，佢哋會用最擅長嘅方式，幫你招呼你嘅爸爸。

你負責帶爸爸嚟，我哋負責煮好佢。

✨ 父親節套餐 $1,998（供4位）

🥗 廚師沙律（鴨肝多士｜意大利火腿｜煙三文魚｜法國煙鱔｜沙律）
🍲 蟹肉魚肚龍蝦湯
🦐 香草忌廉焗海鮮（青口、蜆、帶子、虎蝦、時令海魚）
🍖 精選肉類（威靈頓牛柳｜燒黃油雞｜西班牙黑毛豬｜黑松露薯條）
🍰 甜品（ 西班牙炸油條｜朱古力蛋糕｜焦糖燉蛋｜中大檸檬批）

📅 6月20日（六）及 6月21日（日）｜建議預訂