15/06/2019
Heilsan til nýggju kaféina SYSTRAR
Góðu Systrar, góða Norðurlandahús
Vit í SMAKKA vilja takka fyri 5 góð ár í Norðurlandahúsinum. Vit høvdu í nógv ár droymt um at byrja eina heilsugóða kafé, og stjórin tá, Síf Gunnarsdóttir, gav okkum møguleikan. Vit høvdu tá ongar royndir, eingi starvsfólk men eina sterka visjón um eina grøna og litríka matskrá, og visjónin vann. Tað halda vit sigur nógv um Síf, og um húsið sum vit komu at virka í.
Vit vóru stak heppin. Fryntlig, ágrýtin og dugnalig ungfólk tysjaðu til okkara. Tey vóru skjót at lofta hugsjónini, nom og røsk, og vóru øll við til at menna matin og tænastuna í Føroya fyrstu vistfrøðiligu og mest sum grønu kafé. Uttan allar hesar smakkagentur og dreingir høvdu vit ikki orkað leingi. Túsund takk fyri.
Í fjør fóru vit undir eitt líðandi eigaraskifti við tykkum systrar, Ann og Maiken, í tøttum samstarvi við nýggja stjóran Gunn Hernes. Vit kundu ikki verið meira heppin, tí Gunn av fullum huga tekur undir við grønu kósini, og frá fyrsta degi hevur lagt afturat við nýggjum umhvørvisvinarligum tankum. Nú hava tit tikið heilt yvir, og vit bæði, Hildur og Oyvindur og SMAKKA eru farin at framleiða tarakeks.
Góðu Ann og Maiken. Vit eru so fegin um, at tit, Systrar, hava tikið við kaféini, og serliga at tit, á tykkara egna hátt, halda fram á heilsugóðu leiðini.
Við ynskjum um blíðan byr til tykkara og Føroya heitasta hús
SMAKKA
