19/06/2026
بخصوص الدعوات المنتشرة حاليًا لمقاطعة السمك..
في البداية، إحنا في أسماك الرشيدي بنؤكد إننا لسنا ضد أي دعوة هدفها تخفيف الأعباء عن الناس أو السعي لخفض الأسعار، بالعكس تمامًا، إحنا أول ناس نتمنى إن كل بيت يقدر يشتري احتياجاته بسهولة وربنا يوسع على الجميع.
لكن في المقابل، من الظلم تحميل تاجر السمك وحده مسؤولية أي ارتفاع في الأسعار، لأننا مجرد حلقة من سلسلة طويلة جدًا تبدأ من الصيادين والمزارع وأسواق الجملة والنقل والثلج والعمالة ومصروفات التشغيل اليومية، وتنتهي عند المستهلك.
وللناس اللي بتقول: "اقفلوا المحلات وشاركوا في المقاطعة" .. إحنا معندناش أي مشكلة نقف جنب الناس في أي خطوة هدفها المصلحة العامة، لكن في نفس الوقت عندنا عمال وأسر فاتحة بيوت من الشغل ده، وعندنا إيجارات وكهرباء والتزامات يومية ومستحقات لازم تتدفع. إغلاق المحلات مش معناه إن المصاريف هتقف، ومش معناه إن وراء كل محل عشرات الأسر اللي عايشة منه هتلاقي بديل في يوم وليلة.
للأسف، لاحظنا في الأيام الأخيرة تعليقات فيها شتائم وإساءات وتجريح للتجار بشكل عام، وكأن كل تاجر عدو للناس، والحقيقة إن أغلبنا بيجتهد كل يوم عشان يحافظ على شغله ويستر بيوت العاملين معاه، وبيواجه ظروف وتحديات كتير لا يعلمها إلا ربنا.
الاختلاف في الرأي حق مكفول للجميع، أما الإساءة والتشهير والتجريح فمش هيفيد حد، ومش هيحل أي مشكلة. اللي عنده رأي أو نقد أو استفسار محترم أهلًا وسهلًا بيه، أما التجاوز وقلة الأدب فلن يكون لهما مكان على صفحتنا.
وفي النهاية، نتمنى الخير للجميع، ونتمنى الأسعار تنخفض، ونتمنى الرزق الواسع لكل الناس، سواء بائع أو مشتري، لأننا في الآخر كلنا بنواجه نفس الظروف ونبحث عن لقمة عيش كريمة.
مستر سي فود
"نبيع بالأمانة.. ونسأل الله البركة لنا ولكم."
منقوله عن اخونا مطعم اسماك المرشدي
