18/05/2026
عتاب من القلب.. ولأجل مصلحة الجميع نرجو تفهمنا 🌸
أهلنا وناسنَا الغاليين، دايماً بنعتبر مطعمكم "كربيانو" مش مجرد مكان لأكل وشرب، لاء ده بيتنا التاني اللي بيتشرف بيكم، ودايماً أبوابنا وقلوبنا مفتوحة لأي حد يقصدنا في أي خدمة، حتى لو كان عابر سبيل محتاج يستعمل الحمام، كنا بنشيله في عيونا وبنقول ده حق ربنا والناس لبعضها.
وحتى لما كان بيحصل سهو غير مقصود من اختفاء علبة مناديل أو زجاجة شاور، كنا بنبتسم ونقول "فداكم، وحصل خير".
لكن للأسف، امبارح اتعرضنا لموقف كسر خاطرنا وزعلنا جداً.. شخص دخل واستأذن بكل ذوق يدخل الحمام، ولما خرج ودخل عامل النظافة (الاستيوار) يطهر المكان وراه، اتفاجئنا إن خلاط الحوض بالكامل اتفك واتسرق! وطبعاً الكاميرات وثقت الموقف، وإحنا مجبرين بناخد إجراءاتنا القانونية علشان دي أمانة مكان.
الموقف ده بجد آلمنا، وخلاّنا -ولأول مرة وبكل أسف واعتذار- نأخد قرار صعب علينا جداً، وهو إن استخدام حمامات المطعم هيكون مقتصر على عملاء المكان وزباينه الكرام فقط.
عارفين إنكم أصحاب ذوق وهتعذرونا، لأن القرار ده اتفرض علينا فرض لحماية بيتنا التاني من تصرفات فردية متصدرش من ناس ولاد أصول زيكم.
شكراً لقلوبكم الجميلة وتفهمكم دايماً، وربنا ما يحيجكم ولا يحرمنا منكم دايماً منورينا.
