20/08/2026
افتكروا معانا اللحظات دي كويس.. لأنكم أنتم شركاء النجاح الحقيقيين! ❤️🔥
أنتم فاكرين الأيام دي؟ فاكرين لما كنت بركب السكوتر، أنزل الشارع في الحر والشمس، أوزع المنيوهات بإيدي، وأقعد أتكلم معاكم تجوا تجربوا؟ فاكرين لما كنت بوصل الأوردر بنفسي لأبواب بيوتكم ونقف نتكلم ونضحك؟ أنتم مش مجرد زباين، أنتم شركاء حلم أصليين عشتوا معايا البداية خطوة بخطوة!
القصة بدأت لما كنت شغال في المتحف.. كنت بشتغل بحب وجنون، أجتهد زيادة، وأحاول أجيب زباين ولفت الأنظار، لدرجة إن كذا حد كان يقول لصاحب المكان: "ده بيفوّل المطعم عندك ويمليك المكان!"، وكان بييجي مخصوص يشكرني بنفسه على الشغل والمجهود..
بس الاجتهاد ده اتفهم غلط وعمل حساسية ومشاكل عند ناس كتير، واتصورلي مرة والتانية لحد ما أخدت قرار الـ Termination!
وفي لحظة خروجي ورغم كل اللي حصل، حابب أقول شكراً لكل مرحلة.. لأن كل باب بيتقفل، ربنا بيفتح بسببه أبواب أعظم، وكان ده الدافع اللي خلاني أبدأ رحلة نجاحي وأعرف قيمة نفسي كنت عارف إمكانياتي ومؤمن جداً بموهبتي وقدرتي إن الميدان واسع وأقدر أفرق في أي مكان أروحه.
أخدت آخر مرتب أخدته من هناك — اللي هو المفروض كان يقعدني ويمشيني الشهر واصرف منه — اتجهت بيه كله في أصعب وأكبر ريسك! الأهل في الأول كانوا خايفين ومترددين، بس لما شافوا العرق والإصرار، وقفوا في ظهري وعلى رأسهم أبويا العظيم❤️، السند والبركة والظهر اللي من غير دعائه ودعمه ما كنتش وصلت لأي حاجة في حياتي.. شالوا معايا الحمل وادوني دعم ما يتقدرش بمال.
وبدأنا من مطبخ البيت.. مع بطلة حياتي، زوجتي❤️، اللي شالت معايا الحمل وسط مسؤولية بنتينا الصغيرين.. تعمل الساندوتش بإيديها بكل حب، وأنا أدخل أساعدها وأقفل معاها، واجري أطلع أركب السكوتر ونعمل من البيت اللي محلات كبيرة بإمكانياتها ما قدرت تقف قدامه!
سمعنا كلام يوجع، وكل ما كنت أتكلم عن حلمي وأقول هاعمل إيه، ألاقي ابتسامة تريقة أو استهزاء، أو حد يغير الموضوع ويقلل من كلامي.. بس التريقة والتقليل ده كان "البنزين" اللي ولع جوايا نار التحدي، وأثبتنا إن الإرادة بتهد جبال!
والنهاردة، لما ربنا كرمنا بحلالنا وتعبنا والمحل بقى واقع باسم Grand Egyptian Food.. بنسأل الناس اللي بتحاربنا أو بتحاول تعطلنا: ليه بدال ما تفرحوا لعيلة تعبت وعرقت عشان لقمة عيش بالحلال، بتحاربونا؟!
ولأي حد بيراهن على تعطيلنا أو بيحاول يضايقنا، بنقولها بفضل ربنا بمنتهى الثقة والإشهار: إحنا ماشيين صح ومؤسسين كل خطوة بالقانون وورقنا كله جاهز وسليم 100%.. المكان مجهز ومُؤمّن على أعلى مستوى، المحل ما فيهوش لهب، ما فيهوش أنبوبة، ولا بوتاجاز أصلًا، ومجهزين طبقًا لأعلى المواصفات والاشتراطات عشان سلامة الجميع. بنحترم جيراننا وأهل منطقتنا فوق ما أي حد يتخيل، وسندنا ربنا وأكل عيشنا وبيتنا وحلمنا هنحميه ونحافظ عليه بأعلى درجات الاحترافية والأصول.
في النهاية.. حابب أشكر كل موقف صعب عدينا بيه لأنه هو اللي صنعنا، وكل كلمة تقليل سمعناها لأنها هي اللي زقتنا للقمة.
والشكر الحقيقي والأعظم لكل أخ وأخت وزبون أصيل آمن بينا من أيام السكوتر والشارع وجرّب أكلي واقتنع بينا.. أنتم مش أصحاب فضل بس، أنتم العيلة الكبيرة وشركاء العمر والرحلة، وبوجودكم وتوفيق ربنا مكملين مع بعض لأبعد مكان! ❤️🚀
