04/03/2020
لعشاق القهوه زي حالاتي
6 - السرياقوسي : القهوه السرياقوسي بتبقي عباره عن 3 معالق سكر لكل ملعقه بن ( 3 سكر : 1 بن ) ؛ مبدأيا معظم عشاقها بيبقوا غالبا من محدثين القهوه اللي لسه متلطوش ف الحوار أو من النوع اللي بيشربها كل فين و فين .. قهوه تفضلها النساء في المجمل و عموما السرياقوسي قهوه طريه لزوم الشاب الطري ف بلاش تطول فيها كتير و إنتقل ع المرحله اللي بعدها
5 - الزياده : القهوه الزياده بتبقي 2 ملعقه سكر لكل ملعقه بن ( 2 سكر : 1 بن ) .. دايماً بتكون هيا المدخل اللي بتتسحب فيه نحو عالم إدمان القهوه اللذيذ ؛ ﻷنها قهوه سكرها الزياده بيكسر طعم البن المر اللي لسه ك مبتدئ متعودتش عليه ..
فيه ناس بتستمر في تناول القهوه الزياده ؛ كييفه الزياده بيبقوا ناس ف الأغلب بيهتموا بالمظهر علي عكس الجوهر .. ناس مقضينها For Fun و يحبوا يعيشوا التجربه من السطح بدون التطرق للأعماق و بيقفشوا فشخخخخ لو القهوه جاتلهم ناقصه سكر و دا يدل علي خوفهم من كل ما هو مظبوط أو مانو ..
4 - المانو : القهوه المانو هيا الوسط بين المظبوط و الزياده ؛ ملعقه و نصف سكر لكل ملعقه بن ( 1.5 سكر : 1 بن ) .. المانو غالباً بيتم اللجوء لها في حالتين : يا إما زهقت من الزياده و عايز تنتقل للمظبوط و بتتعود تدريجياً علي تقليل السكر .. يا إما إنتا أصلاً كييف مظبوط بس بتقعد علي قهوه شغال فيها صنايعي فاشل و عمره ما عرف يظبط قهوتك ف بتضطر تطلبها مانو ب نيه المظبوط و التكتيك دا ناجح تماماً مع القهوجيه الفشله .. المانو مرحله إنتقاليه مينفعش تقف عندها كتير ﻷنها ملهاش توصيف دقيق في علم القهوه و الأمزجه !!!
3 - المظبوط : واحد علي واحد ( 1 سكر : 1 بن ) .. قهوه متكافئه تماماً و السواد الأعظم من المدمنين بيلعبوا في ال Category دا .. قهوتك المظبوطه تدل علي شخصيتك المتزنه العادله اللي مبتحبش حاجه تيجي علي حساب حاجه .. إستمتاعك بطعم البن بكميه سكر متوازنه بيخلق جو من السعاده المفرطه التي لا تنتهي سوي مع أخر رشفه من الكوب .. بإختصار كييف القهوه المظبوط إنسان برنسسسسسس في نفسه ﻷقصي درجه ..
2 - ع الريحه : مبدأيا ؛ طالما وصلت للنقطه دي يبقي إنتا مدمن عشق إدمانه و قررت تعلي ال Dose ﻷنك مبقتش تتكيف زي الأول !!! ( 0.5 سكر : 1 بن ) مع السكر اللي بينخفض تدريجياً و طغيان طعم البن ف نحن أمام قهوه صنعت من أجل ال Professionals Only عشان مستحيل تلاقي مبتدأين بيشربوا القهوه ع الريحه ..
فيه قاعده عامه ؛ كلما قلت نسبه السكر بالنسبه للبن ؛ زادت درجه جمدانك و برنستك و مزاجك ..
1 - الساده : ............. تجربه مريره .... لو مش قدها متجربش ....... الموضوع أكبر من تخيلك ...... تكمله الكوبايه بدون ما بطنك تقلب و نفسك تقفل معناها ولاده وحش جديد مبيخافش من أي حاجه بطل لا تقهره الظروف ..... شخصيا مش شايفها تنفع غير ﻷجواء العزاء و المواكب الجنائزيه ... الموضوع عذاب بدون مبالغه .... مع أخر رشفه منها بيتولد جواك شعور دفين بالألم و الحزن
