Burger's Bohrerhof

08/04/2026

MIR SIN PARAT.
Hüt hett d'Burger-Family (zämme si mir schtark) mit em Maxime, em Katia und em Megge d'Gartewirtschaft usegschtuhlt und uf Hochglanz poliert; alles blitzt und glänzt. So chönne es unseri Gescht wieder gniesse unter de über hundertjährige Cheschtänebäum.
Mir freue uns zämme mit unserem Dream-Team uf Euch alli, Liebi Gescht. Voilà

24/03/2026

ES ISCH FRIEHLIG
DR SCHTART VO DR SCHPARGEL-SAISON
UND D'OSCHTERE SIN VIELMOL NÖCH ZÄMME
IM BOHRERHOF
Liebi Gescht und Liebi Fründe vom Bohrerhof

ab sofort hänn mir wieder unseri früsche und butterzarte Schpargle.
So wie Sie das gwöhnt sin bi uns sit über 17 Johr

Und mir dien nüd ändere bim Zubereite. Mir viel Liebi und Freud
serviere mir Ihne d'Schpargle mit Hollandaise und Mayonnaise, huchdünn gschnittenem Parmaschinke und Beischinke us dr Region, oder aber mit chnuschprige Eglifilets, aber au mit Cordonbleu, wie au mit Chalbschteak an Morchelsauce oder warum nid mit Riesekrevette.
Nid z'vergässe unseri wunderbare Neue Brothärdöpfeli derzue
Schparglesuppe und au Schpaglesalat als Entrée….

UNSERI OSCHTERMENUS
(2. April 2026 bis und mit 6. April 2026)

Mir serviere Ihne die verschiedene Menus
Am grüene Dunnschtig Zobe, am Karfritig durchgehend, am Karsamschtig Z'Mittag und Zobe, am Oschtersunntig durchgehend
und au am Oschtermentig durchgehend

Mir alli freue uns uf Sie

Milena, Marija und Marie-Madeleine us dr Chuchi, Angélique, Smilja, Vanessa, Adrien und Delphine vom Buffet und vom Service
Markus & Katia & Maxime

Mir alli sin D'Bohrerhöfler us Allschwil
Nur zämme sin mir schtark

Alles wieteri wie d'Menus und d'Schpargel-Charte gsehnt Dir uf

D'Smilja, unseri nätti, fröhlichi Buffetdame, wo immer konzentriert alli Getränk parat macht am Buffet und au sehr gärn zu de Gescht an Tisch goht, um Getränk oder Ässe z'serviere. Äs het no e Lächle, wenn's no so schtürmt und alles drunter und drüber goht. Und das immer rassig mit em e ch...

16/02/2026

Liebi Gescht,
das isch e Mitteilig vom Bohrerhof

Sie finde das jetzt sicher ziemlig doof. Aber mir hei Ferie!
Und drum isch unser Restaurant zu. Denn au unseri fliessige, liebe und fründliche Meitli und Buebe und mir Wirte bruche ame e Bitzeli Ruh.

Ab em Dunnschtig, 26. Februar si mir wieder sehr gärn für Sie do und mir würde nis natürlich freue, wenn Sie denn wieder zu uns wänn cho.

Mi danke ganz härzlich für s'Läse vo dem Zettel und mir säge bis bald, natürlich bi uns im Bohrerhof, dört wo me sich wohlfühlt und dört
wo s'eim gfallt.

Familie Markus und Katia Burger-Vénuat
und alli unseri liebe Meitli und Buebe
vom Service, vom Buffet und vo dr Chuchi
vom Bohrerhof in Allsschwil

02/02/2026

01/01/2026

Liebi Gescht und Fründe vo unserem Bohrerhof,
mir wünsche Ihne alles Gueti für das neue Joohr.
Mir bedanke uns ganz härzlich bi Ihne für Ihri Treui zu uns.
Das schetze mir sehr. Denn grad in dr hütige Zyt isch das nümme sälbschtverschtändlich. Drum isch das so wärtvoll für uns.
Viele Dank do derfür!
Bi dere Glägeheit no e Gnuss-Information………
Wie immer schtarte mir ins Neue Joohr mit unserne
in dr Zwüschezyt zur Tradition gwordene Drei Filets.

„LES TROIS FILETS BOHRERHOF“
Die beschte und zarteschte Fleischschtück in eim Menu vereint.
Das Menu wird in drei Gäng serviert; also jedes Filet einzeln.
Sie chönne immer wieder Pause mache zwüsche de Gäng.
Ä richtig schöns Menu zum Gniesse, zum Plaudere, zum mitenand si um eifach ä schöne,
gmietliche Obe chönne z’verbringe.
Mir wünsche E Guete! Das sehr gärn scho ab em Fritig Zobe, 2. Januar 2026
Und do vieli Lüt jetzt in de Ferie sin, schicke mir die Information in dr neggschte Wuche nomol.
Menu pro Person à Chf.69.-

S’Foht a mit unserne bekannte Fisch-Chnuschperli mit Tartare-Sauce;
Die offerie mir Ihne zum Apéro
*****

FILET DE PORC AU CURRY
Zartes Schweinsfiletmedaillon vom Schweizer Säuli grilliert
serviert mit rassiger Currysauce und feinem Trockenreis
Knusprig fritierte Banane, grillierte Ananas und andere Früchte
*****

FILET DE VEAU AUX MORILLES
Butterzartes Kalbsfiletmedaillon vom jungen Schweizer Milch-Chälbli grilliert
serviert mit luftiger Morchelrahmsauce, in der auch viele Morcheln schwimmen
Verschiedene frische Gemüse und Butternüdeli
*****

FILET DE BOEUF BÉARNAISE
Ein superzart gelagertes, amerikanisches Rindsfiletmedaillon grilliert mit Sauce Bérnaise
serviert mit Blattspinat und grillierter Tomate
Pommes frites
*****
**
*

Und für die ganz hungrige Gescht, wo noni gnueg hei nach däm Menu gäb’s denn no
s’vierte Filet. Das wäre Lammfilets an Sauce Provençale mit früsche Schpätzli
für en Ufpries vo Chf.19.50

Mir freue uns uf Sie und griesse Sie fründlich.
D’Bohrerhöfler us Allschwil
Markus & Katia Burger-Vénuat und unseri hochgschetzte Lüt
www.bohrerhof.ch
061 301 99 90

21/12/2025

Liebi Gescht und Liebi Fründe vom Bohrerhof,
jetzt hett grad e Zweier-Tisch miesse annuliere für am Wiehnachtsdaag-Mittagsservice. Wär no gärn würdi cho, söll doch bitte alüte oder e Mail schriebe. Mir würde nis sehr freue.
Härzlichscht D'Bohrerhöfler us Allschwil

061 301 99 90 / [email protected] / 079 685 13 25

29/11/2025

Liebi Gescht und liebi Fründe vom Bohrerhof,
D’Fescht-Dääg schtöhn vor dr Tür.
S’isch Zyt, dass mir Sie informiere, was mir möche an dene Dääg.
Im Ahang gsehn Sie unseri Menus für die zwei Dääg……..

Am Dunnschtig, WIEHNACHT, 25. Dezämber 2025 serviere mir Ihne unser Menu ab de Zwölfe und Sie dörfe das gniesse bis am Vieri.
Denn goht’s los mit em Obeservice, wo mir friehschtens am halber Fünfi schtarte. Aber Sie dörfe au erscht am Fünfi, Säxi, Siebeni oder no schpöter cho.
So wie es Ihne am Beschte passt. Fürobe isch churz vor Mitternacht😊
**************************************
Am Mittwuch, SILVESCHTER, 31. Dezämber 2025
Serviere mir Ihne unser Menu nur am Obe ungfähr ab de Säxe, Siebene oder schpöter bis ?????????

Gniesse Sie d’Feschtdääg in unserem schöne, mit viel Liebi dekorierte Restaurant im eifache, gmütliche und heimelige Rahme.
Mir wärde alles mache, dass Sie zfriede und glücklich sin bi uns.
Bi dere Glegeheit möchte mir Ihne alle au „Dangge“ säge für Ihri Treui zu uns s’ganz Joohr dure. Mir schetze das sehr.
Grad und vorallem au in dr hütige Zyt isch das sehr wärtvoll.

Dänke Sie dra. Mir hänn ä chleis Beizli😊
Drum sötte Sie gli reserviere, wenn Sie zu uns wänn cho.

Bruche Sie no e Gschänk-Guetschien und hänn Sie kei Zyt zum Eine cho abhole? Kei Problem. Schriebe Sie e Mail mit em Wunschbetrag und Ihri Adrässe derzue und mir schicke Ihne dr Gschänk-Guetschien mit Izahligsschien bequem zu Ihne hei. Oder bschtelle Sie per Delifon; nach gueter, alter Art.

Liebi Griess und alles Gueti

Markus & Katia mit em Sohn Maxime und siner Cousine Vanessa,
unseri Chöchinne Milena, Marija und Marie-Madeleine,
unser Service-Buffet Brigade Smilja, Angélique, Adrien und Delphine

Mir alli zämme sin D’Bohrerhöfler😊

28/10/2025

Wär hett Luscht, e Geburtsdaagsfeschtli oder e Jubiläum oder e Hochzytsfeschtli z'fiehre bi uns. Dr Chef persönlich präsentiert Ihne unser Chateaubriand immer am Tisch. Derzue serviere mir Béarnaise und Café de Paris, Chnuschprigi Croquettes und Pommes Frites. Wie alles, wo mir mache, wird au das Menu immer mit viel Liebe und Sorgfalt zubereitet.

06/10/2025

NUR AM DUNNSCHTIG REHRUGGE FÜR ZWEI PERSONE
NUR AM DUNNSCHTIG REHRUGGE FÜR ZWEI PERSONE
NUR AM DUNNSCHTIG REHRUGGE FÜR ZWEI PERSONE
NUR AM DUNNSCHTIG REHRUGGE FÜR ZWEI PERSONE NUR AM DUNNSCHTIG……

E wildi Mitteilig wägem Rehrugge
Liebi Gescht und Liebi Fründe vom Bohrerhof.

Wie Dir alli wüsset, serviere mir sit 17 Johr unsere Rehrugge immer
ab minimum 4 Persone.
Jetzt hänn mir aber immer mehr Afrooge, öb mir nid dr Rehrugge au scho ab zwei Persone chönnte serviere. Vieli vo Euch säge uns, dass Sie no nie hei chönne unsere feine Rehrugge gniesse, will sie niemer kenne oder kei Möglichkeit hänn, no zwei Lüt mehr mitz’neh.
Unser Ziel isch jo immer dr zfriedeni Gascht. Drum chömme mir jetzt «e Bitzeli entgege»
Und hänn e Vorschlag…..
Am Dunnschtig; und au nur am Dunnschtig, aber wirklich nur am Dunnschtig und bitte froge Sie nid für en andere Daag; also nur am Dunnschtig serviere mir am Mittag und am Obe REHRUGGE FÜR 2 PERSONE
Fritig, Samschtig und Sunntig isch das NID möglich. Denn do isch es eifach zu schträng. Vieli Tisch sin denn zwei Mol bsetzt und unseri Chuchi wird nid grösser. Do chiemte mir nid noche. Mir bitte um Verschtändnis.
Und jetzt freue mir uns uf alli Päärli, wo ab sofort chömme am Dunschtig cho Rehrugge ässe. Au für zwei chunnt dr Chef an Tisch und präsentiert dr Rehrugge vor em Serviere. Und au das in zwei Gäng; so wie mir das immer mache.

Mir griess Sie fründlich und mir säge bis bald; natürlich bi uns im Bohrerhof, dört wo me sich wohlfühlt und dört wo s’eim gfallt.

Markus & Katia Burger-Vénuat mit em Maxime und unseri wunderbare Fraue und Meitli und unsere unverglichlichi jungi Maa

27/09/2025

Liebi Gescht und liebi Fründe vom Bohrerhof,

Am Dunnschtig, 2.Oktober 2025 goht's wieder los mit em Wild!
S'wird bi uns scho die Siebzähnti Wild-Saison das Johr!

Wie immer hämmer s’'Zartischte vom junge Rehli…….die chömme us em Bayrische Wald, Öschtrich und us em Südtirol. Mir hei nur die absolut beschti Qualität, wo's git uf em Märt. Für das schtöhn mir grad. Zämme mit unserem Metzger ; dr Familie Eiche au do in Allschwil sit über 115 Joohr.

Rehmedaillons vom Nüssli und vom Bäggli, Rehgschnätzlts und Rehpfäffer
Derzue gits Spätzli, Rotchrutt mit Maroni, Poschierti Bire, Zwätschge und Trübeli
Wildrahmsauce mit fünf verschiedene Pilz, Preiselbeeri………und und und….
Mir möche au Rehrugge. Obwohl mir ä chleini Chuchi hei, wei mir dr Rehrugge
schön chönne präsentiere uf dr grosse Platte und denn in zwei Mol serviere. Dass das möglich isch, sötte Sie dr Rehrugge wenigschtens ei Daag vorhär bschtelle und immer für mimimum vier Persone. Denn hei Sie nämlig immer ä ganze Rehrugge. Das gseht au toll us und macht no mehr Luscht.

Natürlich gits au schöni Vorspiese, Chürbissuppe, Vermicelles, Früschi Wähe und mehr.
Die ganzi Wildcharte chönne Sie jederzyt aluege uf unserer Website.

www.bohrerhof.ch

Liebi Griess und viellicht bis bald bi uns im Bohrerhof, dört wo me sich wohlfühlt und dört, wo's eim gfallt!

„D’Bohrerhöfler“ us Allschwil

28/07/2025

Grietzi Liebi Gescht und Liebi Fründe vom Bohrerhof

mir sin zrugg. D'Ferie sin vorbi. Jetzt heisst's wieder dra an d'Säck!

Ab em em Dunnschtig, 31. Juli 2025 si mir wieder
ganz normal und sehr gärn für Sie alli do.
Am Fritig, 1. Auguscht 2025 serviere mir sogar nonstop
durchgehend warmi Chuchi wie an de Sunntige.

Mir freue uns uf Ihre Bsuech.

Liebi Griess

D'Bohrerhöfler us Allschwil