19/03/2026
වැල් පෙනෙල ශාකය Cardiospermum halicacabum අතීතයේ සිට පැවතගෙන එන්නේ මිනිස් සිරුරේ නිරෝගිතාවය රැක දෙන ශාකයක් ලෙසයි.ජ්යෝතිර්වේදීන් සදහන් කරන අන්දමට වැල් පෙනෙල ශාකය දැකීමෙන් ස්පර්ෂයෙන් හා සේවනයෙන් සිකුරු දොස් මග හැර යන බව සදහන් වේ.
මෙහි ඇටවල වාෂ්පශීලි තෛලයක් අන්තර්ගතව ඇති අතර හර්නියා, අන්ඩවාත ඇතුළු වාතාබාධ ප්රතිකාරය සඳහාත් පෙනෙල පංචාංගයම (කොළ, පොතු, මල් ආදී පැළෑටියම) උපයෝගි කර ලබයි.එයට අමතරව කසාය, මැල්ලුම් සහ කැඳ පිණිසත් වැල්පෙනෙල ශාකය යොදා ගනී.වැල් පෙනෙල යනු ඉතා රසවත් ආහාරයක්ද වේ.ශුක්ර ධාතු වර්ධනය සදහා කදිම ආහාරයක් ලෙසද මෙය පෙන්වා දිය හැකිය.විවිධ පෝෂක රසායන ගුණයන්ගෙන් සපිරි වැල් පෙනෙල ශාකය මෙරටත් අනෙකුත් ආසියානු හා අප්රිකානු රටවලත් බහුලව දක්නට ලැබෙනවා.Balloon plant , love in a puff, Balloon vine, heart seed ආදි විවිධ නම්වලින් ද හඳුන්වනු ලබන්නේ වැල් පෙනෙල ශාකයයි.
කෑම රුචිය ඇති කරන්නත් තරුණ පෙනුම රඳවන්නත් හෝමෝන ක්රියාකාරිත්වය වර්ධනය කරන්නත් මෙම ශාකයෙන් ලැබෙන්නේ මහත් රුකුලක්.දේශීය හා ආයුර්වේද සර්වාංග වෛද්ය ප්රතිකාර සඳහා වැල්පෙනෙල, මල් කොළ මුල්, ඇට ගෙඩි දඬු යන සියලු කොටස් යොදාගනු ලබනවා.සතියක ට දෙවරක් වත් වැල් පෙනෙල ආහාරයට ගන්නේ නම් ආහාර ජීර්ණ පද්ධතිය මනාව පිරිසිදුවෙනවා.නිතර ආහාරයට ගන්නේ නම් ආතරයිටීස් රෝගයෙන් වැළකිය හැකියි. වියපත් වීමෙන් පසු ඇතිවන රෝග තත්ත්වයන් අවම කිරීමටද එය උපකාරි වනවා. එසේ ම සම ආරක්ෂා කර පැහැපත් කිරීමට ඊට හැකියි. අව්වට හසුවීමෙන් සම දුර්වර්ණ වීම , කුරුළෑ ගෙඩි අළුහම් ආදි තත්ත්වයන්ට එරෙහිව ක්රියාකර සමෙහි තරුණ පෙනුම රඳවා තබන හැකියාවක් එහි පවතිනවා.හිසකෙස් අකලට පැසීම වළකා නිරෝගි කෙස් කළඹක් වැවීමට ද වැල් පෙනෙලවලට හැකියි. මෙම කොළ රැයක් වතුරේ දමා උදේ එම දියෙන් ම අඹරා හිස ගල්වා සම්බාහනය කොට පැයක් හිඳ නෑමෙන් හිස්සොරි දුරුකරගත හැකියි.
මෙයට අමතරව වැල් පෙනෙල ශාකයේ ඖෂධීය වටිනාකම් මෙසේ දැක්විය හැකිය
වැල් පෙනෙල ශාකයේ යුෂ ස්තී්රන්ගේ ආර්තව සම්බන්ධ රෝගවලට යොදා ගනී. මුත්රා රෝගවලට ගුණදායකයි. මුත්රා හොඳින් පිට කිරීම පහසු කරයි.
වැල් පෙනෙල මුල් හා පත්ර මුත්රා ආසාදන තත්ත්වයන්හිදී ගුණදායකයි. කුසගින්න ඇති කරයි. මෙය සමෙහි ගැල් වූ විට රත් පැහැ වේ. වමනය ඇති කරයි. වාත නාශක ගුණය ඇත.
වැල් පෙනෙල කොළ හා මුල් අතීසාරයට යොදා ගනී. එසේම රක්තාතීසාර රෝගයට ද ගුණයි.
පෙනෙල් මුල් යොදා සැකසූ ඖෂධ වාත රෝග, ආමවාත, අර්ශස්, පණු රෝග වලට යොදා ගනු ලබයි.
මෙවන් ගුණ බොහොමයක් ඇති වැල් පෙනෙල වත්මන විට දී දුර්ලභ ගණයේ පැලෑටියක් බවට පත් වී තිබේ.නාගරික පරිසරය තුළ සොයාගත නොහැකිවන මෙම පැලෑටිය ගම්මානය තුළ දී ද දැකගත හැකි වන්නේ කලාතුරකිනි. සමස්ත සමාජයට විශාල මෙහෙවරක් සිදු කරනු ලබන බෙහෙත් පැලෑටියක් ලෙස වැල් පෙනෙල හදුනාගත හැකි වේ.
