https://www.facebook.com/101319402383851/

Eatso_life, Hong Kong (2026)

22/10/2022

【深水埗🍢免加一烤魚串燒店】

呢間串燒店有烤魚有多款串燒，可以食雞煲打邊爐🐓，或者食幾串串燒，重點係小店全日都免收加一🈹，好抵食！小店座位之間好闊落，而且企理乾淨，枱櫈唔會黐笠笠，同朋友食個飯吹吓水坐得都幾舒服！
-------------------------------------------
剩係串燒都有超級多款式，日式港式串燒類型都有，細分咗海鮮類🐟、燒肉類🐂、烤焗類、素菜類🥦同小食類，今次主力試佢啲串燒先！

🦪◖燒蒜香（即開）生蠔◗ $98/5隻
🦑◖燒魷魚鬚◗ $25
🐂◖燒安格斯牛小排粒◗ $39
🐓◖燒雞柳◗ $16
🐓◖燒雞軟骨◗ $16
🍄◖焗雜菌◗ $35
🍆◖燒蒜香茄子◗ $33
🍍◖燒菠蘿◗ $20
🥬◖燒秋葵◗ $18

佢啲燒生蠔真係必試！佢係即開即燒，每隻都大大粒好肥美，好有鮮味，帶有啲海水味！食落去口感綿滑creamy，面頭舖咗海量嘅蒜🧄同少少辣椒，食落都幾辣！牛小排粒有四粒，牛味幾濃，唔會韌幾juicy，燒得都幾好食！魷魚鬚上面淋咗的燒汁咁嘅醬，甜甜地有啲似食緊章魚燒，燒得比較乾身，食落會有少少硬。焗雜菌都幾大份，有得揀牛油芝士、蒜蓉同埋香辣味，揀咗蒜蓉味，濃濃嘅蒜香加上牛油嘅香氣，食落都幾入味幾鮮甜！

🌟Encore指數：8.5/10
-------------------------------------------
佢菜式有好多選擇，淨係海鮮都已經有十幾款，而且價錢都唔貴，仲有啤酒可以叫，啱曬同朋友過嚟happy hour🍻！所有串燒都係微辣㗎🌶️，如果想走辣要事先同店員講；另外佢地都係即叫即燒，所以都要等耐少少呢！
-------------------------------------------
聚燒遙
📍深水埗褔華街120號地舖
📞23881148

#深水埗美食 #美食 #香港美食 #美食分享 #相機食先 #串燒 #烤魚 #雞煲 #蠔 #生蠔 #燒烤 #聚燒遙 #串燒關注組

21/10/2022

【將軍澳🍛兩餸一湯私房小炒】

呢間係食私房小炒嘅餐廳，舖頭格局都算光猛，擺設擺得有啲似酒樓，坐得舒適，真係有少少喺屋企食飯嘅感覺🙈。有好多唔同款式嘅小炒，上菜都算快！特別推介佢個優惠家庭套餐，人均$100唔洗可以自由搭配2款小炒同1款湯羹🥘，都幾抵食！住附近嘅隨時都可以同朋友或者屋企人，黎食返餐住家飯！
-------------------------------------------
🍅◖鮮茄肉片湯◗ $78
甜甜地嘅蕃茄湯底，落咗啲薑片，酸酸甜甜帶有微辣，特別鍾意佢個肉片好厚，口感彈牙爽口，係會想食咗佢嘅湯渣！

🧆◖黃金豆腐粒◗ $78
豆腐粒控制火候控制得好好，炸皮好薄，好均勻咁沾上椒鹽，食落外脆內嫩！

🐖◖拔絲咕嚕肉◗ $58
咕嚕肉真係有拔絲嘅效果，用嘅部位係豬柳而唔係排骨，食落啖啖肉。咕嚕肉外皮炸得香脆，均勻沾滿惹味嘅茄汁，拎嚟送飯一流！但係伴碟嘅蔬菜就略嫌唔夠味，菠蘿粒亦都係冇咩味呢～

🥬◖金銀蛋浸時蔬 ◗ $88
有三色蛋：鹹蛋、皮蛋同埋雞蛋花，落咗幾粒原粒炸蒜，用上湯浸住啲小白菜，啲小白菜索晒啲精華，好入味！

🌟Encore指數：8/10
-------------------------------------------
小店好受附近居民嘅歡迎，見到都有好多外賣單～如果想食但係唔想等嘅話，可以打電話嚟嗌定外賣自取！
-------------------------------------------
大灰熊廚房
📍將軍澳唐賢街23號帝景灣商場1樓34-35號舖
📞67771628
📞67773289

#將軍澳美食 #美食 #香港美食 #美食分享 #相機食先 #家庭料理 #大排檔 #抵食 #茶餐廳 #私房菜 #小炒

18/10/2022

【深水埗🥢文青韓式家庭料理】

餐廳以薄荷綠為主色調🧸，好有韓式嘅感覺，舖頭細細，有四張枱㗎咋，所以都盡量早啲嚟，唔好撞正食飯時間，一定排晒長龍！小店主要係韓式家庭餐廳料理🏠，款式唔算多，多數都係散嗌，價錢份量同質素都幾好！
-------------------------------------------
🥬◖迷你泡菜煎餅◗ $78
用咗自家醃製嘅泡菜，煎到外脆內軟，裏面好似薯餅咁軟綿。味道偏辣，比普通嘅泡菜辣少少。

🐓◖韓式無骨炸雞配甜辣醬（半份）◗ $78
佢嘅炸雞甜辣醬係自家調配，另上少少辣。炸雞炸得好香脆鬆軟，炸粉薄薄地，上得幾均勻，出到黎都唔會甩皮甩骨！外層炸得香脆，裏面嘅雞肉仲好嫩滑多汁，唔點醬就咁食都已經有味，同唔食得辣嘅朋友仔分享都得！

🍙◖韓式紫菜飯卷◗ $58
有吞拿魚、五花腩、牛肉、菠菜，揀咗吞拿魚包餡。吞拿魚撈埋少少沙律醬，加埋醃蘿蔔、紅蘿蔔、雞蛋絲一齊夾住。啲飯粒粒分明有咬口，又有脆口嘅醃蘿蔔，好有口感，個人幾鍾意呢個飯卷！

🐂◖韓式牛肉炒粉絲◗ $88
炒粉絲落咗好多配料，有雞蛋絲、菠菜、洋蔥、紅蘿蔔，牛肉嘅份量都好多！用咗偏瘦嘅牛肉片，粉絲炒得軟腍入味，呢碟味道正常，但勝在份量夠多！

🍓◖士多啤梨牛奶沙冰◗ $45
士多啤梨牛奶沙冰食到有粒粒碎冰，唔太飲得出牛奶味。味道唔會死甜，冇乜點落糖，唔係越飲越頸渴嗰種，幾好～

🍯◖熱柚子蜂蜜◗ $28
呢杯係去韓國餐廳必嗌嘅嘢飲，正常發揮。

🌟Encore指數：8.5/10
-------------------------------------------
去嗰日咁岩冇晒招牌芝士蛋卷，唯有留返呢個遺憾下次再黎。我哋6:30⏱️食完走嘅時候，啲食客已經開始排隊，所以想試又唔使排隊可能就要揀平日或者下晝tea time呢啲時間，會相對上冇咁多人。
-------------------------------------------
沛
📍深水埗福華街178A號地舖
📞57146478

#深水埗美食 #九龍美食 #美食 #香港美食 #美食分享 #相機食先 #韓國菜 #韓式菜 #炸雞 #抵食 #韓式料理 #打卡

17/10/2022

【尖沙咀🍲抵食精緻上海菜】

上海菜一向都係我最鍾意嘅菜式之一，嘢食啱胃口，而且有齊小食、飯麵類主食同甜品，可以一齊過試曬！餐廳裝修用咗好多木做嘅枱櫈，有少少復古feel，座位都寬落乾淨，坐得都幾舒服。餐廳主打抵食精緻滬菜，連酸菜魚、水煮魚呢啲都有！
-------------------------------------------
🐓◖麻辣雞絲粉皮◗ $68
雞絲粉皮都幾大份，粉皮彈牙爽口，辣度可以自己揀，而且佢個麻辣醬好香芝麻味，又唔會太辣，好好食😋！餐廳好貼心，麻醬可以另上，食幾多粉皮先落幾多醬，唔使俾啲醬cover晒食物嘅原味道！

🥟◖336上海小籠包◗ $38
一籠有四隻，每隻都大大粒，夾起成個小籠包可以盪鞦韆咁搖吓搖吓，外皮厚薄適中，啱啱好夠承受包內嘅湯汁👍🏻一咬落去充盈湯汁爆曬出嚟，湯汁好有豬肉鮮味又唔會太油膩😚蘸埋醋食更正，但小心辣到嘴🥵！

🐟◖叄叄陸酸菜魚（辣）◗ $188
今次揀咗小辣，食落酸味多過辣，除咗有酸菜仲有好多其他配料，好似蓮藕片薯仔嗰啲～個底有紅薯粉，索晒啲酸辣湯，一兜兩個人分都夠食！

🥘◖酸辣湯◗ $45
叫咗一位份量，都好大碗，味道偏酸，辣味欠奉。裏面有啲肉絲同埋其他配料，食落脆脆地嘅口感，有少少似碗仔翅。

🥛◖凍生磨豆漿◗ $18
豆味香濃，唔會太甜，唔怕越飲越口渴～

🌟Encore指數：8.5/10
-------------------------------------------
上海婆婆336
📍尖沙咀彌敦道63號iSQUARE國際廣場6樓605-606號舖
📞28061833

#尖沙咀美食 #九龍美食 #美食 #香港美食 #美食分享 #相機食先 #上海菜 #小籠包 #酸菜魚 #雞絲粉皮

16/10/2022

【旺角🪟落地玻璃復古Cafe】

之前去過旺角嘅分店，今次二訪嚟油麻地呢頭嘅分店，無論食物定係裝修依然十分滿意，仲可以帶埋寵物一齊嘆杯靚啡🐶！呢間分店用咗綠色落地大玻璃，有少少復古嘅感覺，採光度十足！發現佢個Menu都變咗啲，加入咗幾款開心果系列嘅食品，作為開心果迷一定要試❤️！
-------------------------------------------
🦐◖鮮茄海鮮西班牙鍋飯◗ $198
好少見cafe有paella，即管試吓佢！海鮮配料幾足，有大大隻青口、鮮蝦，青口落咗少少海鹽，炙燒過落少少；有兩隻蝦仁同一隻原隻大蝦，海鮮都幾鮮甜有口感唔會梅肉！飯底好有鮮味，煮得軟硬度啱啱好，有少少蕃茄嘅酸味，混合埋洋蔥同埋蒜頭嘅香味，頗有咬口，仲有少少飯焦！

🧇◖手工綠茶窩夫配開心果雪糕◗ $98
窩夫係綠茶味🍵，有四大塊好大份！窩夫暖笠笠外皮好脆，點埋凍冰冰嘅開心果雪糕食，真心正！開心果雪糕有粒粒開心果碎，微甜帶少少甘味，另外仲有啲開心果cream，食落就微鹹帶啲酸微味，食曬都唔會覺得膩！

☕️◖開心果鮮奶咖啡◗ $46
有150mL同埋300 mL可以揀。咖啡面頭落咗啲開心果碎，奶泡好濃厚，影完一轉相都仲未消泡。味道方面咖啡味會重啲，開心果味就冇咁出～如果真係想試濃味啲開心果嘅飲品，可以嗌開心果沙冰！

🍹◖番粉紅◗ $78
呢杯mocktail調得好靚，係好少女嗰種粉紅，好夢幻！入面加入左番石榴、檸檬同柚子，飲落酸酸甜甜，檸檬香味會重少少，有玫瑰花瓣🥀作點綴，成杯嘢好refreshing！

🌟Encore指數：9/10
-------------------------------------------
輕食、主食、甜品都有齊，全部都好高質！嘢飲方面，除咗有經典嘅咖啡飲品，仲有提供無酒精嘅雞尾酒、有酒精嘅咖啡、無咖啡嘅Latte🤪，淨係嘢飲都有好多選擇！坐喺落地大玻璃前面，望住出面人來人往，都幾chill！
-------------------------------------------
Liberty Coffee & Wine²
📍旺角登打士街2號地舖
📞51124237

#旺角美食 #油麻地美食 #油尖旺美食 #美食 #香港美食 #美食分享 #相機食先 #咖啡 #寵物友善 #打卡 #窩夫 #甜品 #海鮮燉飯

15/10/2022

【旺角🥘自選配料石鍋米線】

呢間小店隱藏於女人街附近，招牌係佢嘅石鍋米線，有三餸、六餸同埋九餸可以揀，有好多唔同款式嘅配料揀，而且價錢仲要好抵！石鍋米線裝喺300°C嘅石鍋裏面，熱辣辣上枱。可以自己落配料，好似打邊爐咁，靠石鍋嘅熱度即時煮熟啲食材，咁啲配料就唔會浸到過龍或者煮得太耐，保持食材嘅最佳口感！

除咗有石鍋米線，主食仲有烤魚、荷葉飯同埋多款特色小食🥟、串燒🍢，食物選擇又多又吸引，最重要價錢真係好抵！
-------------------------------------------
🍜◖石鍋米線套餐（六餸）◗ $68
呢個套餐揀咗自己煮，店員會上咗配料九宮格先，然後拎住個300°C嘅熱石鍋，過嚟教你現場煮麵😂。店員會即場教你落咩配料，再加湯焗下佢，要影相就快手，因為成個過程要好快，但呢個體驗係幾好玩嘅～揀咗極品蟹皇湯同埋薯粉，湯底帶有少少鹹蛋黃，煮出嚟嘅配料有起沙！

▪︎ 花膠（+$2）：幾厚幾大塊，但鮮味欠奉
▪︎ 嫩滑雞肉：煮得啱啱好，肉質嫩滑
▪︎ 五香辣豬軟骨：有兩大舊，係軟骨多嘅部位！
▪︎ 貢丸：份量偏少，有一粒半
▪︎ 紅燒牛肚：有四大舊，燜得幾入味
▪︎ 皇帝菜

🍜◖石鍋米線套餐（九餸）◗ $88
呢個套餐比店員幫我煮，直接原鍋上，揀咗火腿瑤柱肉骨湯同米線，湯底清清地帶有少少鮮味，米線索晒啲湯，食落幾正！呢個跟餐加咗杯熱飲，都只係+$5！

▪︎ 響鈴：分開上，食個時候喺啲湯入面淥下佢就可以
▪︎ 蘿蔔：蘿蔔都有好多舊，軟腍入味
▪︎ 美國肥牛（+$2）
▪︎ 花膠（+$2）
▪︎ 蟹柳
▪︎ 蟲草花
▪︎ 冬菇
▪︎ 芫荽
▪︎ 生菜

🌟Encore指數：9/10
-------------------------------------------
佢個石鍋米線都幾大份🤩，份量差唔多係譚仔嘅過橋米線。兩個人嘅話可以叫一個九餸石鍋米線/烤魚share，再加啲串燒、小食，已經好夠飽～
-------------------------------------------
小草十八怪石鍋米線
📍旺角亞皆老街36-38號龍飛大廈地下3-4號舖
📞28112628

#旺角美食 #油尖旺美食 #美食 #香港美食 #美食分享 #相機食先 #米線 #石鍋米線 #烤魚 #串燒

14/10/2022

【上環🍢秘製沙嗲醬串燒】

Happy Friday梗係要嘆返個正lunch，見到公司附近有沙嗲串燒，返工都有正嘢食！餐廳只有外賣，可以用WhatsApp落單📱，有八折優惠🈹，講定幾點嚟拎，慳返lunch hour等餐嘅時間，夠鐘直接上去自取就得，簡簡單單就食到熱辣辣嘅串燒！
-------------------------------------------
🐮◖星加坡牛肉沙嗲便當◗ $98
呢個便當有沙律、炒飯同四串串燒，又好味營養又均勻！炒飯用咗台式紅蔥醬去炒，幾惹味；特別鍾意佢個焦糖燒南瓜田園沙律同埋佢個紅酒醋紅菜頭沙律，全部都係健康嘅蔬果，有啲鷹嘴豆喺入面，食落去甜甜酸酸，好開胃！

🍖◖星加坡雜錦沙嗲（六串）◗ $128
有六串串燒，可以揀雞/牛/豬或者雜錦串燒，同樣地跟個焦糖燒南瓜田園沙律同埋紅酒醋紅菜頭沙律，開胃惹味！串燒淋上秘製沙嗲醬，有粒粒嘅花生，好有口感，串燒嘅肉汁燒得一啲都唔乾柴！

🌟Encore指數：8.5/10
-------------------------------------------
呢間串燒小店方便曬附近返工嘅OL，不失為一間lunch高性價比嘅選擇👍🏻！
-------------------------------------------
R&Y's International Cuisine
📍上環德輔道西103號樂基商業中心1-2樓Freshlane KITCHEN 27
📞46783787

#上環美食 #美食 #香港美食 #美食分享 #相機食先 #午餐 #串燒 #外賣

13/10/2022

【觀塘🐱全部都係貓Cafe】

呢間貓貓Cafe啲貓嘅數量多到驚人，而且每隻都好唔怕生，勁可愛😻！除咗貓係佢嘅賣點，佢啲嘢食種類都好多，小店主打西餐，有意粉、意大利飯、薄餅、漢堡同埋扒類呢啲主食，價錢都好抵！不過黎得呢度，主子當然係重點，嘢食都係其次！🤣
-------------------------------------------
🐖◖西班牙燒烤醬烤大豬肋骨◗ $158
有三條豬肋骨，每條都好大條，淋咗少少燒烤醬🍢，醬料酸酸甜甜，帶點點煙熏味道，好開胃！豬肋骨燒得比較乾身，有少少炭香，但肉質硬少少，用嚟點汁食覺得幾好味喎！伴碟嘅仲有薯蓉同幾片烤茄子🍆，呢個份量其實都幾夠飽！

🦐◖西班牙海鮮燉飯◗ $128
海鮮燉飯配料有蜆肉、大青口、同一隻大蝦，隻蝦好大隻又鮮甜，肉質彈牙，仲帶有少少蝦膏！個燉飯落咗啲薑黃粉，煮得比較軟腍，冇咁有咬口，同埋差少少海鮮嘅鮮味，相對上失色咗少少，但呢個價錢都幾抵食。

🌺◖藍花皇家伯爵荔枝紅茶◗ $72
原壺上嘅花茶，幾個人分都夠飲。可以選擇加蜜糖，會有少少甘甜味；飲落味道好有層次，荔枝同埋伯爵茶嘅香味幾夾！小店好貼心，佢嘅花茶會用蠟燭保溫，慢慢嘆杯茶都唔驚佢會凍，建議浸泡耐啲味道會出啲！

🌟Encore指數：8.5/10
-------------------------------------------
入去之前要套返個鞋套同洗手💦，入面貓嘅數量都唔講得笑，應該都有幾十隻！貓貓當然好自在咁喺舖頭入面行嚟行去，坐喺張枱或者經過你對腳，可以自己去搵啲貓貓影相📸，有咩煩惱都都一掃而空啦~🎐
-------------------------------------------
URBAN Cafe
📍觀塘開源道62號駱駝漆大廈第1座6樓
📞53073636

📍旺角彌敦道566-568A號僑建大廈2樓
📞68326990

#觀塘美食 #工廈美食 #美食 #香港美食 #美食分享 #相機食先 #咖啡 #西餐 #貓

12/10/2022

🦀【抵食$65大閘蟹乸】

天氣開始凍🍃，大閘蟹季節又到啦🦀🦀！之前見到呢間Ig shop嘅大閘蟹好平又抵食，膽粗粗買咗佢黎試，味道同質量又幾好！

❤️‍🔥🈹宜家喺佢到買大閘蟹，只要喺Facebook/Instagram出Post並tag ，每10個like就會送1隻大閘蟹，上限有10隻咁多，呢個推廣勁吸引！🚛買滿$600仲送貨上門，未滿額都可以觀塘或者荃灣自取！
-------------------------------------------
🦀◖大閘蟹乸◗ $65/pcs
今次試咗佢最細嘅size，都有3-3.5兩重，隻隻都好生猛，喺雪櫃拎出黎仲識得郁！

小店好貼心有一張食用指南，呢個size蟹肚向天，擺喺佢比嘅紫蘇葉上面蒸15分鐘就可以⏱️！一打開個蟹蓋就見到啲橙黃色嘅蟹膏🧡，勁吸引！雖然細細隻，蟹膏份量都唔少，食落口感偏硬啲，蟹油仍然豐富！慢慢拆啲蟹肉出黎✂️，點佢秘制嘅大閘蟹醋，酸甜又提鮮，食完仲有黑糖薑茶飲🥃！

🌟Encore指數：9/10
-------------------------------------------
小店嘅大閘蟹有唔同size可以揀，仲可以配埋佢嘅海鮮整成一個set。除咗海鮮之外，仲可以買到打邊爐套餐，連曬所有材料一齊送到屋企！
-------------------------------------------
https://www.daydaydelivery.com/zh-TW/
📍

#美食 #香港美食 #美食分享 #相機食先 #海鮮 #大閘蟹 #蟹

10/10/2022

【觀塘👨‍🍳工廈CP高意法餐廳】

觀塘除咗塞車，仲出名多嘢食，有好多隱世高質工廈餐廳！呢間餐廳主打意大利同法國菜，由前五星級酒店總廚主理，食物水準同品質有返咁上下保證！餐廳嘅菜式比較特別，係真係去高級西餐廳先會見到嘅菜式，仲有自家製嘅甜品冰糕🍰同埋Cocoron，每款都好精緻。喺觀塘工廈平平地就食到酒店嘅水準✨，同朋友慶祝一齊食都好ok！
-------------------------------------------
🦀◖蝦肉蟹肉千層粉◗ $198
出面食到嘅千層麵多數都係肉醬面，呢個係海鮮面，個千層粉會索咗啲海鮮嘅鮮味，加上自帶嘅麵粉香，味道比較特別！加入咗粒粒蝦肉同埋蟹肉絲埋喺千層粉入面，質感比較厚實，好掛汁，仲有少少拉絲！

🐚◖焗田螺薯蓉八粒◗ $92
薯蓉超級軟滑，一啲顆粒都冇，面頭有啲咖喱粉，仲食到陣奶香，好好咁帶出薯蓉嘅味道！田螺煮得軟腍但食落有少少苦，冇乜鮮味。

🥠◖蟹肉雲吞配黑松露忌廉汁◗ $34/pc $120/4pc
散嗌兩粒起($34/pc)，可以每人試一粒，黑松露好香但係會有啲漏。外皮夠煙韌，包住滿滿嘅蟹肉，帶有少少鹹香！

🧀◖芝士火鍋◗ $399/2人
呢個份量絕對唔止兩人份量，建議可以四至五人分享！火鍋食材有紐西蘭牛柳、澳洲豚肉、煙鴨胸、帕爾瑪火腿、司華力腸、西蘭花、法包同娃娃菜，有肉有菜，好豐富！用咗兩隻芝士去做個底，係古椰同大孔芝士，可以keep住食到後期都冇咁重顆粒感。個芝士底比較淡味，相對冇咁漏，咁多樣配料入面覺得煙鴨胸同澳洲豚肉最好食！鴨胸嘅煙熏味同芝士嘅奶香味好夾；澳洲豚肉係半熟，烚吓佢去到七成左右，熱辣辣咁食，肉質軟嫩！食到後期燒乾煲，可以叫店員加忌廉，繼續慢慢食～

🍨◖伯爵茶自家製冰糕◗ $32
冰糕係可以擺得入雪櫃嘅蛋糕，雪凍佢口感軟滑，介乎於蛋糕同雪糕之間嘅口感，好特別嘅一道甜品！今次試咗伯爵茶，茶味香濃，裏面嘅茶味忌廉同蛋糕mix埋一齊，入口即溶！佢仲有有開心果、伯爵茶、荔枝玫瑰、藍莓乳酪、熱情果乳酪、特濃朱古力同埋貓山王榴槤口味可以揀，全部都勁吸引！

🍍◖菠蘿梳打◗ $25
粒粒菠蘿果肉，酸酸甜甜咁～

🍹◖熱情果乳酸◗ $32
質地好濃厚，酸酸地唔會漏，係乳酪嘅口感！

🌟Encore指數：8.5/10
-------------------------------------------
建議可以多少少人一齊share個芝士火鍋，實在太足料兩個人一定食唔曬！
-------------------------------------------

Bro's Cuisine
📍觀塘成業街19-21號成業工業大廈2樓13室
📞57034413

#觀塘美食 #工廈美食 #美食 #香港美食 #美食分享 #相機食先 #私房菜 #芝士火鍋 #西餐 #西餐廳 #生日 #慶祝 #意大利菜 #法國菜 #冰糕 #甜品

09/10/2022

【🐓鮮嫩慢煮即食雞胸】

呢排懶得煮但又想帶飯🍱，發現帶即食雞胸真係又方便又有營養！最近試過一間即食雞胸，好有驚喜！佢有六隻口味，一包大大包有成200g咁大舊，食一包加少少side已經好夠飽🥗，或者可以分開兩餐食都得！呢間嘅即食雞胸係慢煮嘅，肉質好juicy鮮嫩，完全無雞肉嘅味道，都唔似食緊雞胸，比起雞髀🍗肉質仲嫩滑！

▪︎ ᴘᴇᴘᴘᴇʀᴄᴏʀɴ 胡椒
▪︎ ᴊᴀᴘᴀɴᴇꜱᴇ ꜱʜᴏʏᴜ 日式醬油💓
▪︎ ᴋᴏʀᴇᴀɴ ᴄʜɪʟɪ ꜱᴀᴜᴄᴇ 韓式辣醬
▪︎ ᴄᴀᴊᴜɴ 奧紐良香料💓
▪︎ ɪᴛᴀʟɪᴀɴ ʜᴇʀʙꜱ 意式香草
▪︎ ᴍᴀʟᴀʏꜱɪᴀɴ ꜱᴀᴛᴀʏ 馬來沙嗲

呢啲即食雞胸就咁食又得，或者可以同做配料同其他食材一齊煮，今次加咗少少創意，將佢同我鍾意食嘅嘢一齊食，light得黎又唔會好dry，仲有好高蛋白質！
-------------------------------------------
◖🍞ᴄᴀᴊᴜɴ 奧紐良香料酸種麵包◗ ~450kcal
Cajun香料同cheese意外地夾，微辣嘅香料加落酸酸地嘅sourdough，又幾惹味有驚喜！
-
材料：
🍞酸種麵包一片
🐓Polloup 奧紐良香料雞胸一包
🧀低脂spreadable cheese
-
1️⃣先搽好spreadable cheese上酸種麵包
2️⃣酸種麵包噴少少水，200°c 焗8min
3️⃣將Polloup 奧紐良香料雞胸放入平底鍋煎到佢乾身
4️⃣放上焗完嘅酸種麵包上面，OK！
-------------------------------------------
除咗呢個食法，仲有好多懶人食法，試過買一盒沙律，叮熱佢擺入去食，肉質仲好多汁唔乾柴！買滿$500就包送貨上門啦🚛，可以囤定啲貨擺喺雪櫃慢慢食！
-------------------------------------------
https://www.polloup.com/collections/shophk

#美食 #香港美食 #美食分享 #相機食先 #家常菜 #簡單料理 #料理 #料理日記 #食譜 #減肥 #減脂 #減脂餐 #健康 #健康飲食 #料理 #健身 #雞胸 #高蛋白

07/10/2022

【大坑🥘正宗自選印度咖喱】

餐廳好正宗，藍黃色裝修頗有異國風情👳🏻‍♂️，一入到去小店已經聞到好大陣印度香料味！菜式款式好多，剩係咖喱都已經有成十款咁多，每道菜式都係由印度大廚即叫即整，睇完menu之後就可以用QR code落單📱，好方便！
-------------------------------------------
🐓◖奶油咖喱雞塊◗ $128
咖喱一煲仔咁上，有支蠟燭仔喺下邊烘住佢保溫，啲咖喱食到落尾都仲可以keep住暖㗎！咖喱望落好紅，但其實唔係好辣，帶有濃濃嘅番茄同洋蔥香氣，食落微微酸辣。啲雞肉有半鍋嘅份量，肉質軟腍唔柴，帶有一股炭燒嘅味道，同帶有番茄味嘅奶油咖喱配合得幾好！

🫓◖古法烤餅◗ $32
烤餅好鬆厚、軟淋淋，裏面夾住洋蔥同埋薯仔，加咗啲咖喱粉一齊，口感綿密，食落微辣好有咖喱嘅香氣。

🌯◖烤麥餅◗ $88
Roti烤得外面好脆，質感比較乾身冇乜油。本身塊餅冇乜味，食到淡淡嘅小麥香，啱曬完切開佢細細舊拎嚟點咖哩！

🥭◖Mango Lassi◗ $48
印度菜必嗌嘅嘢飲，用咗濃厚嘅乳酪，充滿住濃郁嘅芒果味。甜度啱啱好，加上乳酪嘅酸味，凍凍地酸酸地，拎黎當甜品夠曬開胃解膩！

🌟Encore指數：8.5/10
-------------------------------------------
正宗印度餐廳及酒吧
📍大坑銅鑼灣道58號地舖
📞22679023

📍天后電器道101號地下
📞21468282

#大坑美食 #銅鑼灣美食 #天后美食 #美食 #香港美食 #美食分享 #相機食先 #印度菜 #烤餅 #奶油雞 #咖喱 #奶油咖喱

Eatso_life

22/10/2022

21/10/2022

18/10/2022

17/10/2022

16/10/2022

15/10/2022

14/10/2022

13/10/2022

12/10/2022

10/10/2022

09/10/2022

07/10/2022

Address

Website

Alerts

Shortcuts

Share

Category