06/07/2017
- ماتحطش سكر على القهوة
- القهوة التركى تتعمل فى كنكة نحاس على السبرتاية غير كدة ماتتشربش .
- القهوة تتعمل بمية ساقعة عشان البن يستوى على مهله اللى بيعملوها بمية سخنة دول كفرة .
- لو مابتعرفش تعمل قهوة بوش محترم ماتحاولش ﻷن دى موهبة غير قابلة للإكتساب .
- منتهى الوقاحة إنك تشربها سكر زيادة ، او بسكر اصلا، دى إهانة بشعة فى حق القهوة .
- جرب تحويجات كتير لحد ما تلاقي التحويجة اللى تسلطنك وهايفضل لسة فى الأحلى عشان القهوة عمرها ما بتبخل علينا بس مافيش أى مبرر يخليك تشرب بن عبد المعبود دى قذارة لا تغتفر .
- الاسبريسو تالت احسن اختراع بعد ال google maps و الستات
- مهما كنت متأخر ماتسمحش لحاجة تخليك تكروت الفنجان بتاع الصبح عشان القهوة بتزعل من اللى يكروتها .
- قبل ما تحطها فى الكنكة شمها وأنت بتعملها شيلها من على النار شمها قبل ما تشربها شمها وتشمها بقلبك مش بمناخيرك .
- فنجان القهوة الحلو من مبهجات الحياة وهايخليك تتقبل سخافات العالم بنفس مطمئنة .
- دلق القهوة مش خير والله فى مكونات عظيمة بتتدلق وقلب بيتكسر على الفنجان دة وغالباً هايكون هو أحلى فنجان قهوة عملته هو اللى اتدلق .
- حلاوة القهوة فى مرارتها ، اللى محبش مرارة القهوه مايعرفش عنها حاجه ، القهوة هى الخمرة الحلال .
#قهوة #قهوه
